آرمی چیف جنرل قمر جاوید باجوہ 2روزہ سرکاری دورے پر آسٹریلیا پہنچ گئے۔
پاک فوج کے شعبہ تعلقاتِ عامہ (آئی ایس پی آر)کے مطابق آرمی چیف جنرل قمر جاوید باجوہ کی کینبرا میں ڈیفنس فورسز ہیڈکوارٹر آمد پر تینوں مسلح افواج نے گارڈ آف آنر پیش کیا۔
جنرل قمر جاوید باجوہ نے آسٹریلین آرمی اور بحریہ کے سربراہان کے علاوہ وزیرخارجہ اور وزیر دفاع سے بھی ملاقات کی۔
آرمی چیف نے آسٹریلین سویلین اور فوجی قیادت کو خطے کی سلامتی کی صورتحال اور امن و استحکام کے لیے پاک فوج کی کوششوں سے بھی آگاہ کیا۔
اس موقع پر جنرل قمر جاوید باجوہ کا خطاب کرتے ہوئے کہا کہ پاکستان امن سے متعلق کوششوں کی حمایت جاری رکھے گا۔
انہوں نے مزید کہا کہ پاکستان امید کرتا ہے کہ اس کے سیکیورٹی تحفظات کو بھی دور کیا جائے گا، علاقائی معیشت میں پاکستان کا اہم کردارہے۔
جنرل قمر جاوید باجوہ نے مزید کہا کہ پاکستان نے سیکیورٹی صورت حال بہتر کی ہے۔
آسٹریلوی قیادت نے دفاع اور سلامتی کے شعبے میں تعاون بڑھانے کے لیے عزم کا اظہار کرتے ہوئے دہشت گردی کے خلاف کوششوں پر پاکستان کے کردار کو سراہا۔
