آزادی کپ کے ٹکٹس کے معاملے میں کسی سے زیادتی نہیں کررہے، نجم سیٹھی

پاکستان کرکٹ بورڈ کے چیرمین نجم سیٹھی کا کہنا ہے کہ آزادی کپ کے ٹکٹس کے معاملے میں کسی سے بھی زیادتی نہیں کر رہے۔

لاہور میں آزادی کپ کے لوگو کی تقریب رونمائی کے بعد پریس کانفرنس کرتے ہوئے نجم سیٹھی کا کہنا تھا کہ ورلڈ الیون کا دورہ پاکستان اور اس ایونٹ کی کامیابی سے مستقبل میں ملک میں مزید کرکٹ آئے گی۔

چیرمین پی سی بی نے کہا کہ ہمیں دنیا کو پاکستان کا منفی نہیں بلکہ مثبت پہلو دکھانا ہے۔

انہوں نے کہا کہ پاکستان اور ورلڈ الیون کے درمیان پہلے میچ کے لئے ٹکٹ لینے والوں کی تعداد اور جوش بہت زیادہ ہے، ٹکٹ خریدنے کے لئے ایک آدھ گھنٹا انتظار کرنے میں مایوس نہیں ہونا چاہیے۔

نجم سیٹھی نے اعتراف کیا کہ مسائل ضرور ہیں تاہم آزادی کپ کے ٹکٹس کے معاملے میں کسی سے زیادتی نہیں کر رہے۔

چیرمین پی سی بی کا کہنا تھا کہ آزادی کپ ہمارے لیے بہت اہم ہے اور اسپانسرز بھی ہمارے ہر ایونٹ کو سپورٹ کررہے ہیں۔

نجم سیٹھی نے کہا کہ  اسپانسرز نے پی سی بی کا ہمیشہ سے ساتھ دیا اور اب ہم ایک ایک کر کے ہر ریجن میں اسپانسر ڈھونڈ رہے ہیں۔

خیال رہے کہ پاکستان اور ورلڈ الیون کے درمیان تین ٹی ٹوئنٹی میچز پر مشتمل سیریز کا پہلا میچ 12 ستمبر کو قذافی اسٹیڈیم لاہور میں کھیلا جائے گا۔

سرفراز احمد کی قیادت میں قومی ٹیم احمد شہزاد، فخر زمان، شعیب ملک، بابر اعظم، عماد وسیم، محمد عامر، فہیم اشرف، حسن علی، رومان رئیس، محمد نواز، عثمان شنواری، شاداب خان، عمر امین، عامر یامین اور سہیل خان پر مشتمل ہے۔

 جنوبی افریقی کپتان فاف ڈپلوسی کی قیادت میں ورلڈ الیون ٹیم 11 ستمبر کو پاکستان پہنچے گی۔

مہمان ٹیم ہاشم آملہ، عمران طاہر، مورنی مورکل، ڈیوڈ ملر، جارج بیلی، ٹم پین، سیموئل بدری، بین کٹنگ، پال کولنگ وڈ، گرینٹ ایلیٹ، تمیم اقبال اور تھسارا پریرا پر مشتمل ہے۔

پہلے ٹی ٹوئنٹی میچ کے لئے ٹکٹوں کی آن لائن فروخت یکم ستمبر سے جاری ہے اور جنرل اسٹینڈ کے 500 روپے میں دستیاب ٹکٹ نایاب ہوگئے۔

ٹکٹ فروخت کرنے والی کمپنی کے مطابق پریمیم، فرسٹ کلاس اور وی آئی پی انکلوژر کے ٹکٹس بالترتیب 2500، 4000 اور 6000 میں دستیاب ہیں جب کہ وی وی آئی پی انکلوژر کے 8 ہزار روپے والے ٹکٹ فروخت ہوچکے ہیں۔