بل منظور: نااہل نوازشریف کا پارٹی کی دوبارہ صدارت کا راستہ ہموار

اسلام آباد : نااہل نواز شریف کے لئے پارٹی کی دوبارہ صدارت کاراستہ ہموار ہوگیا۔ انتخابی اصلاحات بل 2017ء کثرت رائے سے منظور کر لیا گیا، سینیٹ میں اکثریت کے باوجود اپوزیشن کو شکست کا سامنا کرنا پڑا۔

تفصیلات کے مطابق حکومت نے انتخابی بل دوہزار سترہ ایک ووٹ کی برتری سے منظور کرالیا، اعتزاز احسن نے ترمیم پیش کرتے ہوئے کہا کہ چاہتے ہیں کہ عدالتی سزا یافتہ اور شہریت چھوڑنے والا شخص پارٹی سربراہ بھی نہ بن سکے۔

بل کی اہم ترین شق 203کو38اراکین نے حق میں جبکہ37نے مخالفت میں ووٹ دیا، نتیجتاً یہ ترمیم منظور کرلی گئی، جس کے بعد نواز شریف کے دوبارہ پارٹی صدر بننے کی راہ ہموار ہو گئی ہے۔

رضا ربانی ناراض ہوکر ایوان سے اٹھ کر چلے گئے

انتخابی بل دوہزار سترہ کی منظوری کے عمل پر چیئرمین سینیٹ رضا ربانی ناراض ہوکر ایوان سے اٹھ کر چلے گئے اور اپنی سیٹ احتجاجاً عبدالغفور حیدری کے حوالے کردی، ان کا کہنا تھا کہ میری رائے کو اکثریتی رائے نے مسترد کردیا، میرے فیصلے کے خلاف ایوان نے اپنا فیصلہ دیاہے، اخلاقی طور پر آج کے اجلاس کی صدارت نہیں کرسکتا۔

اپوزیشن اراکین کا اجلاس سے احتجاجاً واک آؤٹ

قبل ازیں ترمیم میں ایک اورترمیم کے ذریعے چیئرمین کی رولنگ ان ڈو کرنے کے خلاف اپوزیشن نے شدید احتجاج کرتے ہوئے واک آؤٹ کیا جبکہ اس معاملے پروفاقی وزیر قانون زاہد حامد اور چیئرمین کے درمیان سخت جملوں کے تبادلے کے بعد چیئرمین نے احتجاجاً اجلاس کی کارروائی معطل کردی، پانچ منٹ سے زائد اجلاس کی کارروائی معطل رہی جس کے بعد ڈپٹی چیئرمین عبدالغفور حیدری نے سینیٹ کی کارروائی جاری رکھی۔

متحدہ سینیٹ اراکین نے نواز شریف کے حق میں ووٹ دیا

ایم کیو ایم اراکین نے نواز شریف کو دوبارہ پارٹی صدر بنانے کیلیے ن لیگ کی حمایت کی جس پر راجہ ظفر الحق اور زاہد حامد نے ایم کیو ایم اراکین کا نشستوں پر جا کر شکریہ ادا کیا۔

یاد رہے کہ پولیٹیکل پارٹیز آرڈر سال دوہزار دو کے تحت نااہل شخص پارٹی کا صدر نہیں بن سکتا تھا، بل کی منظوری کے بعد پولیٹیکل پارٹیز آرڈر کی ایک شق کا خاتمہ ہوجائے گا، شق دو سو تین کی منظوری سے نااہل شخص پارٹی کا صدر بن سکتا ہے