نئی دلی: بھارتی مشرقی ریاست جھارکنڈ میں کوئلے کی ایک کان میں دب کر 11 مزدور ہلاک ہوگئے۔
غیرملکی خبررساں ادارے کے مطابق بھارتی ریاست جھارکھنڈ میں ایک کان دھنس گئی جس کے نتیجے میں 11 مزدور دب کر ہلاک ہوگئے جن کی لاشیں نکالی جاچکی ہیں تاہم اب بھی ملبے تلے 2 سے 3 مزدوروں کی موجودگی کا خدشہ ہے۔ جائے وقوعہ پر ریسکیو آپریشن عارضی طور پر روک دیا گیا ہے جب کہ جھارکھنڈ پولیس کے ترجمان کا کہنا ہے کہ ملبے سے 11 مزدوروں کی لاشیں نکال لی گئی ہیں اور مزید ایک سے دو مزدور ملبے تلے ہوسکتے ہیں۔
دوسری جانب حادثے کے موقع پر 15 سے 16 مزدور جان بچا کر نکلنے میں کامیاب ہوگئے تھے جنہیں معمولی چوٹیں آئیں تاہم کچھ مزدور کان کے اندر ہی پھنس کر رہ گئے جب کہ اب تک حادثے کی کوئی وجہ سامنے نہیں آسکی تاہم حکومت نے تحقیقات کا حکم دے دیا۔
