سابق صدر جنرل پرویز مشرف نے الزام عائد کیا ہے کہ سابق وزیراعظم بے نظیر بھٹو اور ان کے بھائی مرتضیٰ بھٹو کو پاکستان پیپلز پارٹی کے شریک چیرمین آصف زرداری نے قتل کرایا۔
سابق وزیر اعظم بےنظیر بھٹو کو 27 دسمبر 2007ء کو عام انتخابات کی مہم کے سلسلے میں راولپنڈی کے لیاقت باغ میں ایک جلسے کے اختتام پر گاڑی میں سوار ہوتے ہوئے فائرنگ اور بم دھاکہ کے نتیجے میں شہید ہو گئی تھیں۔
پرویز مشرف نے ایک ویڈیو پیغام میں بے نظیر بھٹو اور کے بھائی مرتضیٰ بھٹو کے قتل کا ذمہ دار آصف علی زرداری کو قرار دیا۔
پرویز مشرف نے کہا کہ دیکھنا چاہیے کہ بے نظیر کے قتل کا فائدہ کس کو ہوا؟ کس نےبےنظیر کو ٹیلی فون کرکےگاڑی سے باہر نکلنے پر اکسایا؟
انہوں نے کہا کہ بے نظیر کے قتل کا فائدہ ایک ہی آدمی آصف زرداری کو ہوا، بیت اللہ محسود کو سازش کرکے استعمال کیا گیا۔
سابق فوجی صدر نے کہا کہ ’آصف زرداری نے مجھ پر بے نظیر بھٹو کے قتل کا الزام لگایا اور نام لے کر مجھے للکارا ہے۔‘
پرویز مشرف نے بے نظیر کے بچوں کا ذکر کرتے ہوئے کہا کہ وہ بلاول، آصفہ، بختاور اور قوم کو بتانا چاہتے ہیں کہ بے نظیر کا اصل قاتل کون ہے۔
یاد رہے کہ بے نظیر بھٹو کے قتل کیس میں پرویز مشرف بھی نامزد ملزم تھے اور انہیں عدالت اپنے فیصلے میں مفرور ملزم قرار دے چکی ہے۔
عدالت نے اپنے فیصلے میں دو پولیس افسروں کو سترہ ،سترہ سال قید کی سزا سنائی تھی جب کہ 5 ملزمان کو بری کر دیا تھا۔
اس حوالے سے پرویز مشرف کا موقف ہے کہ بے نظیر قتل کیس میں ان کے خلاف امریکی لابیسٹ مارک سیگل کے بے معنی بیان کے علاوہ کوئی ثبوت موجودہ نہیں اور یہ مقدمہ مکمل طور پر بے بنیاد، جھوٹ اور خود ساختہ ہے۔
