لاہور : تربیلا ڈیم میں پانی کی سطح ڈیڈ لیول پر پہنچ گئی، ڈیم آج کسی بھی وقت خالی ہو سکتا ہے۔
ذرائع کے مطابق تربیلا ڈیم میں پانی کی سطح ڈیڈ لیول پر پہنچ گئی ہے، ڈیم آج کسی بھی وقت خالی ہو سکتا ہے۔ ڈیم میں پانی کی کم سے کم سطح 1380فٹ ہے جبکہ اس وقت تربیلا ڈیم میں صرف 1380.56 فٹ پانی موجود ہے۔ اگر ڈیم خالی ہو گیا تو بجلی کی پیداوار بند اور لوڈشیڈنگ میں اضافہ ہوگا۔
تربیلا ڈیم میں پانی کی آمد 12 ہزار 400 کیوسک اور اخراج 28 ہزار کیوسک ہے، منگلا ڈیم میں پانی کی آمد 25 ہزار 200 کیوسک اور اخراج 22 ہزار کیوسک ہے۔ اس وقت منگلا ڈیم میں صرف 9 فٹ پانی موجود ہے۔
ماہرین کے مطابق اگر ڈیموں میں پانی ختم ہو گیا تو گندم کی فصل میں بڑے پیمانے پر کمی کا اندیشہ ہے، تربیلا ڈیم سے 3 ہزار 478 میگا واٹ کی بجائے صرف 550 میگاواٹ جبکہ منگلا ڈیم سے ایک ہزار کی بجائے صرف 280 میگاواٹ بجلی پیدا ہو رہی ہے۔ اگر ڈیمو ں میں پانی ختم ہو گیا تو بجلی کی پیداوار مزید کم ہو جائے گی۔
