جھل مگسی : درگاہ فتح پور شریف میں عرس کے دوران خودکش حملے کے سبب پولیس افسر سمیت 15 افراد شہید اور درجنوں زخمی ہوگئے۔
تفصیلات کے مطابق جیکب آباد سے 200 کلومیٹر دور بلوچستان کے علاقے جھل مگسی میں قائم درگاہ فتح پور شریف میں ماہانہ میلے میں ہونے والے دھماکے میں 15 افراد شہید ہوگئے، جس میں ایک پولیس افسر بھی شامل ہے۔
ذرائع کا کہنا ہے کہ دھماکے کے وقت درگاہ میں کچہری جاری تھی کہ خود کش بمبار داخل ہوا اور پولیس کی جانب سے روکنے اور چیکنگ کے دوران خود کو دھماکے سے اڑا لیا۔
پہلے سے اطلاعات تھیں کہ ایسا حملہ ہوگا، بلوچستان حکومت
ترجمان بلوچستان حکومت نے کہا ہے کہ دھماکا خود کش تھا جس میں ایک اے ایس آئی بھی شامل ہے، دشمن نے اس بار پھر معصوم لوگوں کو نشانہ بنایا ہے، ہمیں پہلے سے اطلاعات تھیں کہ دشمن اس قسم کا حملہ کریں گے۔
حملہ خودکش تھا، وزیر داخلہ بلوچستان
وزیر داخلہ بلوچستان سرفراز بگٹی نے بھی حملہ خودکش ہونے کی تصدیق کی اور کہا کہ چیکنگ کے دوران بمبار نے خود کو اڑالیا۔
کمشنر نصیر آباد احمد عزیز تارڑ نے بتایا کہ دھماکے میں 15 افراد شہید اور 20 کے قریب زخمی ہوئے، ہلاکتوں میں اضافے کا خدشہ ہے۔
