حضرت جنید بغدادی کے وعظ کی شہرت عام ہوئی تو ایک دن ایک عیسائی نوجوان آپکی خدمت میں حاضر ہو کر کہنے لگا ”لوگ آپکو شیخ زمانہ کہتے ہیں ” حضرت جنید بغدادی نے نوجوان کی بات سن کر فرمایا ” یہ لوگوں کا حسن ظن ہے "اگر تم یہی بات کہنے کے لئے مرے پاس آئے ہو تو اپنا وقت برباد نہ کرو. میں اللہ کا ایک ادنیٰ سا بندہ ہوں. اس کے سوا کچھ نہیں. مقام شیخ بہت بلند ہے جو میری دسترس میں نہیں… آپکا ارشاد سن کر نوجوان بولا ” دراصل میں اس لئے حاضر ہوا ہونکہ آپکی زبان سے پیغمبر اسلام کے اس قول کی تشریح سن سکوں. یہ کہہ کر عیسائی نوجوان نے سرور کونین صلی اللہ علیہ وآلہ وسلم کی یہ حدیث پاک سنائ ” مومن کی فراست سے ڈرو کہ وہ اللہ کے نور سے دیکھتا ہے ” اسکا کیا مطلب ہے ؟ عیسائی نوجوان کا سوال سن کر حضرت جنید بغدادی نے سر جھکا لیا. حاضرین مجلس نے محسوس کیا جیسے حضرت شیخ کسی خاص نقطے پر غور فرما رہے ہیں. چند لمحوں بعد حضرت جنید بغدادی نے سر اٹھایا اور عیسائی نوجوان سے مخاطب ہو کر فرمایا "اس کا مطلب صرف اتنا ہے کہ اب تم مسلمان ہو جاؤ ” حضرت جنید بغدادی کا ارشاد گرامی سنتے ہی عیسائی نوجوان آپ کے دست حق پرست پر ایمان لے آیا اور اس نے بر سر مجلس با آواز بلند اللہ کی واحدانیت اور سرور کونین صلی اللہ علیہ وآلہ وسلم کی رسالت کی گواہی دی. حضرت جنید بغدادی کی مجلس میں موجود بعض افراد نے عیسائی نوجوان سے پوچھا, تمہارا سوال کچھ اور تھا اور حضرت شیخ نے جواب کچھ اور دیا… نوجوان کہنے لگا, حضرت شیخ نے میرے سوال کا بلکل صحیح جواب دیا, میں بہت دنوں سے ایک عجیب ذہنی کشمش میں مبتلا تھا کہ مذہب اسلام اختیار کروں یا نہ کروں. میرا دل اسلام کہ حقانیت کی طرف کھینچتا تھا مگر میرے پیروں میں آباء و اجداد کے عقائد کی زنجیر تھی. اسی دوران میں نے حضور اکرم صلی اللہ علیہ وآلہ وسلم کی حدیث مبارکہ سنی اور اسکی تشریح کے لئے حضرت شیخ کی خدمت میں حاضر ہوا. حضرت شیخ کے کشف باطنہ کا یہ عالم ہیکہ میری ذہنی کشمش سے آگاہ ہوگئے اور پھر مجھے یقین آگیا کہ واقعتہً مومن اللہ کے نور سے دیکھتا ہے.
