.اسلام آباد : امریکی ماہرین صحت کا کہنا ہے کہ روزانہ 56 گرام اخروٹ کے مغز کا استعمال ٹائپ ٹو ذیابیطس سے تحفظ فراہم کرتا ہے۔
یونیورسٹی آف پنسلوینیا کے ماہرین کے مطابق دل اور خون کی شریانیں تنگ ہونے سے ٹائپ ٹو ذیابیطس کا مرض لاحق ہوسکتا ہے جس میں انسانی جسم مناسب مقدار میں ہارمون نہیں بناپاتا جب کہ اخروٹ میں فیٹی ایسڈز کی مقدار ، وٹامن ای اور فولیٹ جیسے اجزاءجسم میں کولیسٹرول کو جمع نہیں ہونے دیتے اور دوران خون کو بحال رکھتے ہیں۔
یونیورسٹی کے ماہر پروفیسر کے مطابق اخروٹ صحت پر کئی لحاظ سے مثبت اثر ڈالتا ہے خصوصاً دل کو صحت مند رکھتا ہے۔ماہرین کے ایک مختصر مطالعے میں ایسے مرد و خواتین پر تحقیق کی گئی ہے جو ذیابیطس کے کنارے پہنچ چکے تھے۔ ان میں سے 25 سے 75 برس کے افراد کو 6 ماہ اخروٹ کھانے کو دیئے گئے جس کے بعد 3 ماہ کا وقفہ کیا گیا اور دوسرے گروپ کو اخروٹ کھلائے گئے۔
یہ تمام افراد کئی امراض کے دہانے پر تھے جن میں ذیابیطس، زائد وزن، ہائی بلڈ پریشر، کولیسٹرول اور خون میں شکر کی زیادتی جیسے امراض شامل ہیں۔ نتائج کے مطابق رضاکاروں کے دونوں گروہوں میں دل، کولیسٹرول، بلڈ شوگر اور دیگر طبی کیفیات میں بہتری دیکھی گئی۔
ماہرین کا کہنا ہے کہ اخروٹ کو روزمرہ خوراک میں شامل رکھا جائے تو اس کے حیرت انگیز نتائج مرتب ہوسکتے ہیں اور ٹائپ ٹو ذیابیطس سے بھی بچا جا سکتا ہے۔
