راجہ نواز کی ڈاکٹر عبدالقدیر خان سے خصوصی ملاقات :تحریر ؛جاوید عظیمی
ہالینڈ دی ہیگ کی معروف شخصیت اور ممتاز تاجر راجہ اسحاق نواز اپنے تجارتی معاملات کو فروغ دینے اوراس میں مزید تیزی لانے کی غرض سے گزشتہ چند سالوں سے پاکستان میں قیام پزیر ہیں گزشتہ دنوں انھوں نے اپنے ایک دوست کے ہمراہ عالمی شہر ت یافتہ سائنسدان محب وطن ہر دلعزیز شخصیت اور محسن پاکستان ڈاکٹر عبدالقدیر خان سے ان کی رہائش گاہ پر خصوصی ملاقات کی مذکورہ طویل دورانیے کی ملاقات میں ڈاکٹر عبدالقدیر خان نے یاد رفتگان کے سلسلے میں ہالینڈ قیام کے دوران رو نما ہونے والے یادگار واقعات اور سنہری یادوں کا تفصیلی ذکر کرتے ہوئے کہا کہ میں 1960کے عشر ے میں حصول تعلیم کے لئے پاکستان سے جرمنی گیا۔
برلن یونیورسٹی میں تعلیمی حصول کا سلسلہ جاری رکھا اس دوران جب تعطیلات ہوئیں تو میں دیگر ممالک کی سیرو سیاحت کے لئے سفر کرتا اور کئی بار ہالینڈ آنے کا بھی موقعہ میسر آیا یہاں ایک دوکان میں مقامی خاتون سے ملاقات ہوئی یہ ملاقات مرحلہ وار پہلے دوستی بعد ازاں شادی کے مضبوط بندھن میں بندھ گئی۔
ڈاکٹر صاحب نے گفتگو کا سلسلہ جاری رکھتے ہوئے اپنی شادی سے متعلق بتاتے ہوئے کہا کہ میرا نکاح درویش صفت انسان اللہ تعالیٰ کے برگزیدہ بندے اور اس وقت سفیر پاکستان کے عہدے پر بھی فائض تھے ۔ روحانی شخصیت محترم قدرت اللہ شہاب نے پڑھایا ۔گفتگو کے دوران ایک موقعہ پر ایٹم بم کی تیاری کے مراحل کی تفصیلات بیان کرتے ہوئے ڈاکٹر صاحب نے کہا کہ اس پروجیکٹ کا آغاز سابق وزیر اعظم ذوالفقار علی بھٹو کے دورحکومت میں ہوا۔ میں نے اس سلسلے میں بھٹو صاحب سے رابطہ کیاتو انھوں نے خوشی کا اظہار کرتے ہوئے مجھے اس پرو جیکٹ پرکام کرنے کے لئے مدعو کیا مگر ان کے دور میں اس پر بہت سست روی سے کام ہوا۔کچھ عرصے بعدبھٹو صاحب کی حکومت کا خاتمہ ہو گیا۔ جنرل ضیاالحق کے دورے اقتدار میں اس پراجیکٹ پر بڑی سرعت سے کام ہوا مختصر اً سابق وزیراعظم میاں محمد نواز شریف نے اپنے دور ے حکومت کے دوران28 مئی1998 کو تیار شدہ ایٹمی پراجیکٹ کے باعث ایٹمی دھماکے کر دیئے جس سے پاکستان ایٹمی قوت رکھنے والے ممالک کی فہرست میں شامل ہو گیا۔محسن پاکسان ڈاکٹر عبدالقدیر خان نے کہا اس بڑے پراجیکٹ کی تیاری کے مراحل میں اور مکمل ہونے کے بعد بھی مجھے بڑی مشکلات کا سامناکرنا پڑا مگر اللہ کی مدد شامل حال رہی اس لئے میں ہر مشکل کا سامنا جواں مردی اور ہ مت سے کرتا رہا نامساعد حالات کے باوجود اس کام کو پائیہ تکمیل تک پہنچایا۔
اس طویل دورانیے کی گفتگو میں ہالینڈ کا تذکرہ کرتے ہوئے کہا کہ میں نےDELFT یونیورسٹی سے بھی تعلیم حاصل کی اور اس دوران میری ا رہائش RijS WijK اورDEN HAAG میں بھی رہی۔ڈاکٹر صاحب نے ایک موقعہ پر بتایا کہ آجکل میں غریبوں کے لئے AQکے نام سے 300تین سو بستروں پر مشتمل ہسپتال لاہور میں قائم کررہا ہوں جس میں شب و روز مصروف عمل ہوں
محسن پاکستان ڈاکٹر عبدالقدیر خان اس وقت اپنی فیملی کے ساتھ پاکستان میں قیام پذیر ہیں اور پاکستان کی ترقی ،کامیابی، خوشحالی ،سلامتی ،بقاء اور تحفظ کا جذبہ اب بھی ترو تازہ اور جوان ہے۔ڈاکٹر صاحب نے اپنی تحریر کردہ کتابیں راجہ نواز کو تحفتاً دئیں۔
