سمندری طوفان سے ہیوسٹن میں 18 افراد ہلاک، ٹیکساس میں کرفیو نافذ

امریکی ریاست ٹیکساس میں طوفان ہاروی کی تباہ کاریوں کا سلسلہ جاری ہے اور ہیوسٹن میں مزید 3 افراد ہلاک ہوگئے جس کے بعد ہلاکتوں کی تعداد 18 ہوگئی۔

ریاست ٹیکساس کے شہر ہیوسٹن میں سمندری طوفان کی تباہ کاریاں جاری ہیں، لوگوں کو محفوظ مقامات پر پہنچانے کے لئے کشتیوں کی مدد لی جارہی ہے اور رضا کار پانی میں پھنسے لوگوں کو محفوظ مقام پر پہنچانے کا کام انجام دے رہے ہیں۔

دوسری جانب طوفان ہاروی کی وجہ سے کیمیکل پلانٹ میں دھماکے کا خدشہ ہے جس کے پیش نظر ارد گرد کی آبادی کو خالی کرالیا گیا ہے۔

سمندری طوفان سے متاثر امریکی شہر ہیوسٹن میں رات کو کرفیو نافذ کردیا گیا ہے اور میئر کا کہنا ہے کہ چوری، ڈکیتی، لوٹ مار اور رات کے وقت ڈرائیونگ کے واقعات کی روک تھام کے لئے کرفیو نافذ کیا گیا ہے۔

سیلاب سے متاثرہ افراد کو جارج براؤن کنونشن سینٹر میں رکھا گیا ہے جہاں 5 افراد افراد کی گنجائش ہے تاہم سینٹر میں 9 ہزار سے زائد افراد موجود ہیں، بستروں کی کمی کے باعث متاثرین زمین پر ہی سونے پر مجبور ہیں۔

امریکا کی ہوم لینڈ سیکیوررٹی کے سیکرٹری ایلن ڈیوک کا کہنا ہے کہ سیلاب سے متاثرہ تقریبا 20 ہزار افراد کو مختلف حفاظتی مقامات پر منتقل کیا جاچکا ہے۔

شہر میں 2 فٹ سے زائد بارش ریکارڈ کی گئی ہے جس کے بعد گلیاں سڑکیں انڈر پاسز سب پانی میں ڈوبے ہیں۔ کئی مقامات پر 10 فٹ تک پانی جمع ہے اور مسلسل بارش کے باعث اس میں مزید اضافے کا خدشہ ظاہر کیا جارہا ہے۔

فیڈرل ایمرجنسی مینی جمنٹ ایجنسی کے مطابق طوفان سے 30 ہزار افراد بے گھر ہوئے ہیں۔