سندھ ہائیکورٹ نے ڈاکٹر عاصم کی ضمانت منظور کرلی، ریفری جج نے 479 ارب روپے کی کرپشن کے2 مقدمات میں سابق مشیر پیٹرولیم ڈاکٹر عاصم حسین کی ضمانت منظور کی،چیف جسٹس سندھ ہائیکورٹ نے 2 رکنی بینچ کے اختلافی فیصلے پر معاملہ ریفری جج کو بھیجا تھا۔
سابق مشیر پیٹرولیم ڈاکٹر عاصم حسین کے خلاف 479 ارب روپے کی کرپشن کے2 مقدمات کی سماعت سندھ ہائیکورٹ میں ہوئی۔
ریفری جج جسٹس آفتاب گورڑ نے طبی بنیاد پر ڈاکٹر عاصم کی ضمانت منظورکرتے ہوئے انہیں 50 لاکھ روپے کے مچلکے جمع کرانے کا حکم دےدیا۔
چیف جسٹس سندھ ہائیکورٹ نے 2 ججوں کے اختلافی فیصلے پر معاملہ ریفری جج کو بھجوایا تھا، گزشتہ سماعت پر فریقین کے دلائل مکمل ہونے کے بعد جسٹس آفتاب گورڑ نے درخواست ضمانت پر فیصلہ محفوظ کیاتھا۔
ڈاکٹر عاصم کو 26 اگست 2015 کو ہائر ایجوکیشن کمیشن کے دفتر سے گرفتار کیا گیا تھا،ڈاکٹر عاصم حسین پر دہشت گردوں کے علاج میں سہولیات کی فراہمی کے کیس کےعلاوہ نیب کی جانب سے دو ریفرنس بھی دائر کیے گئے۔
462 ارب روپے کی کرپشن سے متعلق نیب ریفرنس میں منی لانڈرنگ، پلاٹوں پر قبضہ اور اختیارات کے ناجائز استعمال جیسے الزامات ہیں۔
نیب کے مطابق ڈاکٹر عاصم نے اپنے دور میں گیس کی مصنوعی قلت پیدا کی،ڈاکٹرعاصم پر ضیاء الدین اسپتال کے قیام کے لئے غیرقانونی طور پر زمین حاصل کرنے کا بھی الزام ہے۔
دہشت گردوں کے علاج میں سہولیات کی فراہمی سے متعلق کیس میں ڈاکٹر عاصم پہلے ہی انسداد دہشت گردی عدالت سے ضمانت حاصل کرچکے ہیں۔
کیس میں میئر کراچی وسیم اختر، ایم کیو ایم رہنما روف صدیقی، سلیم شہزاد، پاسبان کے جنرل سیکرٹری عثمان معظم اور پاک سرزمین پارٹی کے رہنما انیس قائم خانی بھی شریک ملزمان ہیں،تمام ملزمان ضمانت پر رہا ہیں۔
