سرور کائنات فخر موجودات صلی اللہ تعالٰی علیہ و علی آلہ و اصحابہ و بارک و سلم کی آمد وہ عظیم المرتبت انعام ہے جس کو منعم حقیقی نے اپنی قدرت کی زبان سے خصوصی طور پر علیحدہ ذکر کیا ۔ارشاد فرمایا ۔بےشک احسان فرمایا اللہ تبارک و تعالٰی نے مومنوں پر جب اس نے بھیجا ان میں انہی میں سے ایک بڑی شان والا رسول ۔پڑھتا ہے ان پر اس کی آیتیں اور انہیں پاک کرتا ہے اور انہیں کتاب و حکمت کی تعلیم دیتا ہے ۔اگر چہ وہ اس سے پہلے کھلی گمراہی میں تھے ۔(سورہ آل عمران آیت نمبر 164
آقا دو عالم شفیع معظم صلی اللہ تعالٰی علیہ و علی آلہ و اصحابہ و بارک و سلم اللہ تبارک و تعالٰی کی خاص الخاص نعمت ہیں جس سے اللہ تبارک و تعالٰی نے خاص اہل ایمان کو سر فراز فرمایا ۔اسی لئے غلامان مصطفی علیہ اجمل التحیہ و اطیب الثناء ہر زمانے میں اپنے رب کریم کی اس نعمت کبری کا شکر ادا کرتے آئے ہیں ۔زمانے کے تقاضے کے اعتبار سے شکر کے انداز گو مختلف تھے لیکن جذبہ تشکر ہر عمل کا روح رواں رہا ہے ۔اور جو خوش بخت اس نعمت کی قدر و قیمت سے آگاہ ہیں وہ تا ابد اپنی فہم اور استعداد کے مطابق اپنے رحیم و کریم پروردگار کا شکر ادا کرتے رہیں گے ۔
