سیرتِ مصطفیﷺ
آقاءِ دوعالم شفیعِ معظم صلی اللہ تعالیٰ علیہ و علیٰ آلہ و اصحابہ و بارَکَ و سَلَّم اللہ تبارک وتعالیٰ کی سب سے بڑی نعمت ہیں۔ویسے تو اللہ تبارک و تعالی کی نعمتیں لا تعداد اور بے شمار ہیں۔لیکن حضور رحمتِ عالم کی ذات ربِّ ذوالجلال جلَّ جلالُہ کی نعمتِ کبریٰ ہے۔وہ ذات والا صفات جس نے بندوں کا ٹوٹا ہوا رشتہ اپنے خالقِ سے پھر سے استوار کیا۔جس نے انسانیت کے خوابیدہ بخت کو بیدار کیا۔جس نے اولادِ آدم کے بگڑے ہوئے مقدر کو سنوارا۔جو کسی خاندان ،قبیلے ،قوم اور ملک اورزمانہ کے لئے رحمت بن کر نہیں آئے بلکہ اللہ تبارک و تعالیٰ کی ساری مخلوق کے لئے ابرِ رحمت بن کر تشریف لائے۔جن کی فیض رسانی زمان و مکان کی قیود سے آشنا نہیں بلکہ وہ ہر تشنہ لب کو معرفتِ الٰہی کے آبِ زلال سے سیراب کرنے کے لئے تشریف لائے۔آپ ہر گم کردہ راہ کو صراطِ مستقیم پر گامزن کرنے کے لئے جلوہ افروز ہوئے۔اللہ تبارک و تعالیٰ کی اس نعمتِ عظمیٰ کا اللہ تبارک و تعالیٰ کی بارگاہ میں شکر ادا کرنے کا بہترین طریقہ یہ ہے کہ ہم اللہ تبارک و تعالیٰ اور اس کے محبوب کے مطیع اور فرمانبردار بن جائیں اور اپنی تمام خواہشات کو شریعتِ مطہرہ کے تابع بنا دیں۔
متعلقہ خبریں
