شاداب خان کا بگ بیش لیگ سے معاہدہ

لاہور:پاکستان سپر لیگ میں شاندار کارکردگی دکھانے والے کرکٹر شاداب خان نے آسٹریلیا کی بگ بیش لیگ سے معاہدہ کر لیا ہے۔

18 سالہ شاداب خان اس وقت نیوزی لینڈ کے کھلاڑی برینڈن میکلم کی قیادت میں ویسٹ انڈیز کی کیریبئن پریمئر لیگ (سی پی ایل )میں بھی کھیل رہے ہیں۔

اب وہ 19 دسمبر میں شروع ہونے والی بگ بیش لیگ کے ساتویں سیزن میں برینڈن میکلم ہی کی قیادت میں ’برسبین ہیٹ‘ کے لیے کھیلتے نظر آئیں گے۔

برسبین ہیٹ نے شاداب کو ویسٹ انڈیز کے لیگ اسپنر سیموئل بدری کی جگہ ٹیم میں شامل کیا ہے۔ سیموئل بدری 2015 سے 2017 تک برسبین ہیٹ کے لیے 6.42 کی اکانومی کے ساتھ 13 میچوں میں صرف 14 وکٹیں حاصل کر سکے۔

شاداب خان نے پہلا ٹی 20 میچ مارچ میں ویسٹ انڈیز کے خلاف اسی کے سرزمین پر کھیلا ۔ انہوں نے اپنے پہلے ہی ٹی 20 میچ میں 7 رنز دے کر تین وکٹیں حاصل کیں اور مین آف دی میچ قرار پائے۔ اس کے اگلے ہی میچ میں شاداب نے اپنی شاندار کاکردگی کا سلسلہ جاری رکھا اور 14 رنز دے کر 4 وکٹیں حاصل کی۔

کیریبئن لیگ میں بھی شاداب 6 میچوں میں 10 وکٹیں حاصل کر چکے ہیں۔

ہیٹ کے کوچ ڈینئل ویٹوری کا کہنا ہے کہ ’شاداب خان ٹی 20 کرکٹ کے بہترین نوجوان کھلاڑی ہیں اور اُس اسٹائل کی کرکٹ میں بہترین فٹ ہوتے ہیں جو ہم آئندہ سیزن میں کھیلنا چاہتے ہیں۔‘

ویٹوری کے مطابق برینڈن میکلم شاداب خان سے کیربیئن لیگ میں کافی متاثر ہوئے ہیں ۔

اس سے قبل شاداب خان کا بنگلہ دیش پریمئیر لیگ سے بھی معاہدہ ہو چکا ہے۔