شامی فورسز حلب میں عام شہریوں کو نشانہ بنارہی ہے،کمشنر اقوام متحدہ برائے انسانی حقوق

حلب: شام میں اقوام متحدہ کے کمشنر برائے انسانی حقوق کا کہنا ہے کہ حلب میں حکومتی کنٹرول مضبوط ہونے کے بعد شامی صدر بشارالاسد کی حامی فورسز نے عام شہریوں کو نشانہ بناناشروع کردیا ہے۔
غیرملکی خبررساں ادارے کے مطابق گزشتہ روز شامی فورسز نے حلب پر مکمل کنٹرول کا اعلان کیا تھا جب کہ حکومتی فورسز اور باغیوں کے درمیان شہریوں کے انخلا سے متعلق ایک معاہدہ بھی ہوا تھا جو 24 گھنٹے بھی برقرار نہ رہ سکا۔ شام میں موجود اقوام متحدہ کے کمشنر برائے انسانی حقوق کا کہنا تھا کہ حلب میں حکومتی کنٹرول مضبوط ہونے کے بعد شامی صدر بشارالاسد کی حامی فورسز نے عام شہریوں کو نشانہ بنانا شروع کردیا ہے اور لوگوں کے گھروں میں داخل ہو کر انھیں نشانہ بنا یا جارہا ہے جب کہ فورسز نے شہری آبادی پر گولہ باری بھی کی جس میں متعدد افراد ہلاک اور درجنوں زخمی ہوگئے۔
دوسری جانب ریاستی ٹی وی نے دعویٰ کیا ہے کہ باغیوں کی جانب سے حلب کے علاقے بستان القصر کے نواح میں راکٹ فائر کیا گیا جس کے نتیجے میں 7 افراد ہلاک اور متعدد زخمی ہوئے جس کے بعد ایک مرتبہ پھر باغیوں کے خلاف جھڑپ کا آغاز کردیا گیا ہے اور گزشتہ روز شہریوں کے انخلا سے متعلق ہونا والا معاہدہ بھی ختم ہوگیا۔