لاہور: نگران وزیراعلیٰ پنجاب ڈاکٹر حسن عسکری نے کہا ہےکہ نگران حکومت فری اینڈ فیئر الیکشن کرانے کے لیے آخری حد تک جائے گی۔
نگران وزیراعلیٰ پنجاب حسن عسکری، چیف سیکریٹری اور آئی پنجاب کےدرمیان ملاقات میں آزادانہ، شفاف اور منصفانہ الیکشن کے انعقاد کو ہر قیمت پر یقینی بنانے کے عزم کا اعادہ کیا۔
اس موقع پر نگران وزیراعلیٰ نے کہا کہ نگران حکومت فری اینڈ فیئر الیکشن کرانے کے لیے آخری حد تک جائے گی، پر امن اور شفاف انتخابات یقینی بنانے کے لیے ہر وسائل بروئے کار لائے جائیں گے اور جو ذمہ داری دی گئی ہے اسے قومی امانت سمجھ کر پورا کریں گے۔
ڈاکٹر حسن عسکری کا کہنا تھاکہ غیر جانبدارانہ الیکشن کو یقینی بنانا ہم سب کی مشترکہ ذمہ داری ہے اور عام انتخابات کیلئے تمام سیاسی جماعتوں کو یکساں مواقع فراہم کریں گے۔
یاد رہے کہ گزشتہ دنوں نگران وفاقی حکومت نے چاروں صوبوں کے چیف سیکریٹریز اور آئی جیز کو تبدیل کیا تھا۔
