لاہور: نیوزی لینڈ کے سابق کرکٹر گرانٹ ایلیٹ اور معروف کمنٹیٹر ڈینی مورسن نے لاہور قلندرز کے کام کو شاندار قرار دے دیا۔
ڈینی مورسن اور گرانٹ ایلیٹ لاہور قلندرز کے میچز کے حوالے سے پاکستان پہنچے ہیں جہاں لاہور میں لاہور قلندرز کے رانا فواد اور عاقب جاوید کے ہمراہ پریس کانفرنس کرتے ہوئے ڈینی مورسن نے کہا کہ لاہور آنے پربہت خوش ہوں، قلندرز نے اس ریجن میں جو کام شروع کیا وہ بہت شاندار ہے۔
ڈینی مورسن نے کہا کہ اچھا ٹیلنٹ سامنے لانے پر رانا فواد کا شکریہ ادا کرتے ہیں، پاکستان میں کرکٹ کا جنون ہے اور بہت مواقع ہیں، ملک میں جتنا ٹیلنٹ ہے اسے پروموٹ ہونا چاہیے۔
انہوں نے کہا کہ لاہور قلندرز اور ہم سب کا مقصد بہترین ٹیلنٹ سامنے لانا ہے۔ ایک سوال کے جواب میں ان کا کہنا تھا کہ پاک سری لنکا ٹی ٹوئنٹی لاہورمیں ہوا توبہت بڑی بات ہوگی۔
نیوزی لینڈ کے سابق کرکٹر گرانٹ ایلیٹ نے کہا کہ ایک لاکھ 60 ہزار بچوں کے ٹرائل لینا ناقابل یقین ہے، اتنی بڑی تعداد میں ٹرائلز کبھی نہیں دیکھے۔
اس موقع پر رانا فواد کا کہنا تھا کہ عاقب جاوید جیسا کوچ ملنا خوش آئند ہے، چھوٹے شہروں کے لڑکوں کو بھی سامنے لانا چاہیے، ایبٹ آباد میں ٹرائلز کا مقصد چھوٹے شہروں کے ٹیلنٹ کو موقع دینا تھا۔
لاہور قلندر کے کوچ عاقب جاوید نے کہا کہ لاہور قلندرز جیسے ٹیلنٹ ہنٹ پروگرام کی بہت ضرورت ہے، ہم پی سی بی کا بازو بن کر ٹیلنٹ تلاش کررہے ہیں۔
