میرپور میں آسٹریلیا کو شکست، بنگلہ دیش نے تاریخ رقم کردی

میرپور: بنگلہ دیش نے اپنی ہی سرزمین پر تاریخ رقم کرتے ہوئے پہلے ٹیسٹ میچ میں آسٹریلیا کو 20 رنز سے شکست دے دی۔

میرپور کے شیر بنگلہ کرکٹ اسٹیڈیم میں کھیلے گئے ٹیسٹ میچ میں جیت کے لیے بنگلہ دیش نے مہمان ٹیم کو 265 رنز کا ہدف دیا ۔

ہدف کے تعاقب میں کھیل کے چوتھے روز کا آغاز آسٹریلیا نے دو وکٹوں کے نقصان پر 109 رنز کی مضبوط پوزیشن سے کیا اور ڈیوڈ وارنر نے اپنے کیرئیر کی 19 ویں سنچری بناتے ہوئے اسٹیو اسمتھ کے ساتھ 130 رنز کی شراکت قائم کی ۔

لیکن بولرز کے لیے مددگار وکٹ پر بنگلہ دیش کی ٹیم دونوں بلے بازوں کی پارٹنر شپ ٹوٹتے ہی میچ میں واپس آگئی ۔

آسٹریلیا کے لوئر آرڈر نے بھی میچ میں واپسی کی بھرپور کوشش کی لیکن وہ اپنی ٹیم کو شکست سے نہ بچا سکے ۔ آسٹریلیا کی پوری ٹیم دوسری اننگز میں 244 رن بنا کر آوٹ ہو گئی اور بنگلہ دیش نے میچ 20 رنز سے جیت لیا۔

شکیب الحسن نے شاندار بولنگ کا مظاہرہ کرتے ہوئے 5 وکٹیں حاصل کیں اور میچ کے بہترین کھلاڑی قرار پائے جب کہ تیج الاسلام نے تین اور حسن مرزا نے 2 کھلاڑیوں کو پویلین بھیجا۔

بنگلادیش نے ٹیسٹ کرکٹ کی تاریخ میں آسٹریلیا کو پہلی مرتبہ شکست دی۔

آسٹریلیا کی جانب سے دوسری اننگز میں اوپننگ بلے باز ڈیوڈ وارنر 112 رنز کے ساتھ نمایاں رہے جب کہ 5 کھلاڑی ڈبل فیگر میں بھی شامل نہ ہوسکے۔

کپتان اسٹیون اسمتھ 37، پیٹر ہینڈس کوم 15، گلین میکسویل 14 اور لیون 12 رنز بنا کر آؤٹ ہوئے جب کہ پیٹ کمنس 33 رنز کے ساتھ ناٹ آؤٹ رہے۔

ٹیسٹ کرکٹ میں ایک عرصے تک جیت کو ترسنے والی بنگلہ دیش کی ٹیم گزشتہ ایک سال کے دوران انگلینڈ، سری لنکا اور آسٹریلیا جیسی بڑی ٹیموں کو شکست دے چکی ہے۔

آسٹریلیا کے خلاف فتح میں بنگلہ دیش کے دو سینئر کھلاڑیوں شکیب الحسن اور تمیم اقبال نے اہم کردار ادا کیا۔ یہ دونوں کھلاڑیوں کے اپنے کیرئیر کا 50 واں ٹیسٹ میچ تھا جسے انہوں نے یادگار بنا دیا۔

تمیم اقبال نے پہلی اننگز میں 71 اور دوسری میں 78 رنز بنائے جب کہ شکیب الحسن نے پہلی اننگز میں 84رنز بنائے اور بولنگ کرتے ہوئے دونوں اننگز میں پانچ ، پانچ وکٹیں حاصل کیں۔

آج تک ٹیسٹ کرکٹ میں کوئی بھی کھلاڑی دو مختلف مواقوں پر 80 رنز سے زائد بنانے کے ساتھ ساتھ 10 وکٹیں نہیں لے سکا ہے اور صرف شکیب ہی واحد کھلاڑی ہیں جو ایسا کر چکے ہیں۔

 انہوں نے اس سے قبل 2014 میں کھلنا کے مقام پر زمبابوے کے خلاف بھی ایسی ہی کارکردگی کا مظاہر کیا تھا۔