اسلام آباد: نگران وزیراعظم ناصرالملک سے آرمی چیف جنرل قمر جاوید باجوہ نے ملاقات کی۔
نگران وزیر اعظم اور آرمی چیف جنرل قمر جاوید باجوہ کی پہلی ملاقات وزیراعظم آفس میں ہوئی جس میں پاک فوج کے سربراہ نے جسٹس (ر) ناصرالملک کو عہدہ سنبھالنے پر مبارک باد دی اور نیک خواہشات کا اظہار کیا۔
نگران وزیراعظم اور آرمی چیف کی ملاقات میں ملکی سلامتی، پیشہ وارانہ امور اور ملکی سیاسی معاملات پر بات چیت کی گئی۔
جب کہ آرمی چیف کی جانب سے نگران وزیراعظم کو انتخابات کے انعقاد کے سلسلے میں مکمل سیکیورٹی فراہم کرنے کی یقین دہانی کرائی گئی۔
نگران وزیراعظم سے چیئرمین جوائنٹ چیفس کی بھی ملاقات
دوسری جانب نگران وزیراعظم سے چیئرمین جوائنٹ چیفس آف اسٹاف کمیٹی جنرل زبیر حیات نے بھی ملاقات کی اور جسٹس (ر) ناصر الملک کو عہدہ سنبھالنے پر مبارکباد دی۔
نگران وزیراعظم اور چیئرمین جوائنٹ چیفس کی ملاقات میں ملکی سلامتی اور مسلح افواج کی پیشہ وارانہ امور پر بات چیت کی گئی۔
یاد رہے کہ نگران وزیر اعظم جسٹس (ر) ناصر الملک وفاقی حکومت کی آئینی مدت پوری ہونے کے بعد وزیراعظم مقرر کیے گئے ہیں۔
