قبائلی علاقے پارہ چنار میں پھر دہشت گردی نے سر اٹھایا ہے ، شہر کے مصروف علاقے میں دھماکے کے نتیجے میں شہید افراد کی تعداد بڑھ کر 24ہوگئی، واقعے میں 90 سے زائد افراد زخمی ہوئے ہیں۔
پولیٹیکل ایجنٹ کا کہنا ہے کہ دھماکا خیز مواد کار میں نصب تھا، جاں بحق افراد کے ورثاء کو فی کس 4 لاکھ روپے اورزخمیوں کے لیے ایک ایک لاکھ روپے امداد کا اعلان بھی کیا گیا ہے۔
پارا چنار ایک بار پھر دہشت گردی کا شکار بن گیا، شہر کے وسط میں نور مارکیٹ کے قریب واقع مرکزی امام بارگاہ کے دروازے پر بارود سے بھری گاڑی سے حملہ کیا گیا، دھماکے کی جگہ سے مارٹر کا ٹکرا بھی ملا ہے، حملے میں متعدد گاڑیاں اور دکانیں تباہ ہوئیں، پاک فوج اور سیکیورٹی فورسز نے علاقے کو گھیرے میں لے لیا۔
وزیر اعظم نواز شریف نے دھماکے کی شدید مذمت کرتے ہوئے غمزدہ خاندانوں سے ہمدردی کااظہارکیا اور کہا کہ دہشت گردی کا ہرقیمت پرمکمل خاتمہ کیا جائے گا۔
وزیرداخلہ چوہدری نثار نے دہشت گردی کے واقعے کی شدید مذمت کرتے ہوئے تمام اداروں کو ہنگامی اور مؤثر اقدامات کرنے کی ہدایت کی ۔
آئی ایس پی آر کے مطابق دھماکے کے زخمیوں کو نکالنے کے لئے آرمی ایویکیوشن یونٹ سے تعلق رکھنے والے ہیلی کاپٹرجائے وقوعہ پر بھیجے، زخمیوں میں سے 20افراد کو سی ایم ایچ اسپتال منتقل کیا گیا ہے ،جن میں سے 7کی حالت تشویشناک ہے ۔
دھماکے کے بعدزخمیوں کو اسپتال منتقل کرکے تمام طبی مراکز پر ایمرجنسی نافذ کردی گئی اور ڈاکٹر، پیرامیڈکس، نرسز اور دیگر متعلقہ اسٹاف کو طلب کرلیاگیا۔
واضح رہے کہ رواں سال جنوری میں پارہ چنار کی سبزی منڈی میںہونے والے دھماکے میں 21افراد جاں بحق اور 50سے زائد زخمی ہوگئے تھے۔
