کراچی کے عوام کی مشکلات کو کم اور نقصانات کے ازالے کے انتظامات کیے جائیں‘

اسلام آباد: وزیراعظم شاہد خاقان عباسی کا کہنا ہےکہ بارش کے باعث کراچی کے عوام کی مشکلات کم کرنے اور نقصانات کے ازالے کے لیے انتظامات کیے جائیں۔

کراچی میں گزشتہ دنوں ہونے والی شدید بارشوں سے مختلف حادثات میں 20 سے زائد افراد جاں بحق ہوئے جب کہ کراچی تاجر اتحاد کے چیرمین عتیق میر کے مطابق بارشوں سے تاجروں کو کروڑوں روپے کا نقصان ہوا۔

وزیراعظم نے کراچی میں بارش سے پیدا ہونے والی صورتحال کا نوٹس لیا تھا۔

جیونیوز کے مطابق وزیراعظم شاہد خاقان عباسی کی زیر صدارت کراچی میں بارشوں سے پیدا ہونے والی صورتحال پر اجلاس ہوا جس میں وزیراعظم کو کراچی میں بارشوں سے ہونے والے نقصانات اور لگائے گئے تخمینے پر بریفنگ دی گئی۔

اجلاس میں وزیراعظم نے حکام کو ہدایت دی کہ کراچی کے عوام کی مشکلات کو کم کرنے اور نقصانات کے ازالے کے لیے مؤثر اور فوری انتطامات کیے جائیں۔

وزیراعظم نے کہا کہ عام آدمی کو ریلیف دینے کیلئے تمام ممکنہ وسائل استعمال کیے جائیں جب کہ نقصانات کے ازالے کے لیے سندھ حکومت کو ہرممکن معاونت و مدد کی فراہمی جاری رکھی جائے۔