ہر سال یورپ سمیت دنیا بھرمیں نئے سال کی خوشی میں آتشبازی کی جاتی ہے ۔جس پر اربوں ڈالر یا یورو صرف کئے جاتے ہیں ۔اپنی خوشی یاتسکین کے لئے اتنی خطیر رقم کا اصراف کوئی دانشمندی نہیں۔جبکہ آتشبازی سے ہر سال کئی قیمتی جانوں کا نقصان اُٹھانا پڑتا ہے۔امسال بھی کئی افراد کے جسمانی اعضا بھی ضائع ہوگئے۔ہم چونکہ ہالینڈ میں مقیم ہیں۔چنانچہ یہاں ہونے والے واقعات کا تذکرہ کرنا مناسب سمجھتے ہیں۔آج سے 25سال قبل بہت جارہانہ انداز میں آتشبازی کا مظاہرہ کیا جاتا تھا۔یہاں تک کہ کھڑی گاڑیوں کو آگ لگا دی جاتی تھی اور کثیر تعداد میں لوگ اپنے گھروں کا سامان سڑکوں پر جمع کرکے آگ لگا دیتے جس کے باعث ٹریفک کا نقل وحرکت میں خلل واقع ہو جاتا ہر طرف فائربریگیڈ کی گاڑیاں آگ پر قابو پانے کے لئےنظر آتیں۔انہی دنوں نئے سال کی خوشی میں آتشبازی کرتے ہوئے روٹرڈیم میں ایک خاندان کے چار افراد میاں بیوی اور دو بچے دھماکے دار پٹاخے استعمال کرتے ہوئے ہلاک ہوگئے۔دوسری جانب ایمسٹرڈیم کا رہائشی 14سالہ لڑکا آتشبازی کے دوران ہاتھ گنوا بیٹھا اس طرح کے کئی حادثات رونما ہوئے۔
ہالینڈ کےBRANDWONDEN CENTRA GRONINGEN-ROTTERDAMاورBeverwijk کی رپورٹس کے مطابق 23دسمبر سے3 جنوری تک 135افراد آتشبازی سے جلے جن میں27 افراد شدید جھلس گئے انھیں اسپتال میں داخل کرلیا گیا۔جبکہ 75افراد کو فوری طور پر ٹریٹمنٹ کرکے فارغ کردیا گیا۔ان اعداد وشمار سے باآسانی اندزہ لگایا جاسکتا ہے کہ گیارہ روز کے اندر کثیر تعداد میں افراد آتشبازی کی لپیٹ میں آئے۔یہ صرف ہالینڈ میں کی گئی آتشبازی کے اعدادوشمار ہیں دیگر ممالک میں بھی صورتحال اس سے مختلف نہیں لیکن اس کے باوجود ہر سال نئے سال کی خوشی میں کی جانے والی آتشبازی میں کوئی خاطر خواہ کمی نہیں آتی۔جبکہ ہالینڈ کی پولیس ہر سال باقاعدگی سے غیر قانونی آتشبازی کے سامان کی روک تھام کے لئے چھاپے مارتی ہے مگر اس کے باوجود غیرقانی اور زور دار دھماکہ کرنے والا آتشبازی کا سامان ہالینڈ میں آجاتا ہے۔اس کےسدباب کے لئے مزید سخت اقدامات کی ضرورت ہے تاکہ شہریوں کی جان اور املاک کو بچایا جاسکے۔
