ملک کے 52 ویں یوم دفاع کے موقع پر تینوں مسلح افواج کے سربراہان نے خصوصی پیغامات جاری کیے۔
پاک فوج کے شعبہ تعلقات عامہ (آئی ایس پی آر) کی جانب سے آرمی چیف جنرل قمر جاوید باجوہ کا خصوصی ویڈیو پیغام جاری کیا گیا ہے جس میں جنرل قمر جاوید باجوہ نے کہا کہ مشرق اور مغرب میں دشمن کہیں بھی موجود ہیں سن لیں کہ ان کا گولہ بارود اور گولیاں ختم ہوجائیں گی لیکن ہمارے جوانوں کی چھاتیاں ختم نہیں ہوں گی۔
پاک فضائیہ کے سربراہ ایئرچیف مارشل سہیل امان نے اپنے پیغام میں کہا کہ یوم دفاع پاکستان ہمیں اپنے بہادر سپوتوں کی عظیم قربانیوں کی یاد دلاتا ہے، جوانوں نے مثالی حوصلے اور پیشہ ورانہ مہارت کے ساتھ دشمن کی جارحیت کا منہ توڑ جواب دیا، ملک کو درپیش غیر معمولی مشکلات اسی جذبہ قومیت کی احیاء کے متقاضی ہیں، ہم سب یک جان ہو کران حالات کا مردانہ وار مقابلہ کر یں گے۔
انہوں نے کہا کہ شہدا نے تاریخ کے نئے باب رقم کیے جو آنے والی نسلوں کے لیے مشعل راہ ہیں، شہدا نے بلاشبہ، جرات و بہادری کے شاندار کارنامے سر انجام دے کر قربانی کی لازوال مثالیں قائم کیں، قوم مادروطن کی خاطر اپنی جانیں نچھاور کرنے والوں کو سلام اور خراج تحسین پیش کرتی ہے۔
پاک بحریہ کے سربراہ ایڈمرل ذکاءاللہ کا اپنے پیغام میں کہنا تھا کہ آج کا دن اپنےغازیوں، شہدا کی بے مثال شجاعت اور ثابت قدمی کےنام کرتے ہیں۔ انہوں نے کہا کہ پاک نیوی اپنی بندرگاہوں، ساحلی پٹی، سمندری راہداریوں کے دفاع کے لیے ہر دم تیار ہے جب کہ پرامن بقائے باہمی کی خواہش کے ساتھ خطے میں تبدیلیوں اور چیلنجز سے باخبر رہنے کی ضرورت ہے۔
